Gwyneth Paltrow përballet me reagime të forta pas reklamës për projekt luksoz në Izrael!

Aktorja fituese e çmimit Oscar, Gwyneth Paltrow, është përballur me një valë kritikash në rrjetet sociale pasi mori pjesë në një reklamë për një projekt luksoz të pasurive të paluajtshme në Izrael.

53-vjeçarja shfaqet në një fushatë promovuese për “51 Park”, një projekt 51-katësh në qytetin bregdetar Herzliya, pranë Tel Avivit. Reklama është xhiruar në Nju Jork dhe është publikuar këtë javë.

Në video, Paltrow thotë: “Ka një arsye pse ndërtesat më ikonike në botë janë pranë një parku. 51 Park.” Kur pyetet nëse ndërtesa ndodhet në Nju Jork, ajo përgjigjet: “Herzliya. Izrael.”

Edhe pse nuk e ka shpërndarë reklamën në llogarinë e saj personale në Instagram, përdorues të shumtë të rrjeteve sociale kanë reaguar ashpër, duke e kritikuar për promovimin e një projekti në Izrael në një kohë kur situata në Gaza mbetet e tensionuar.

Disa prej tyre kanë postuar flamuj palestinezë dhe mesazhe në mbështetje të Palestinës.

CNN ka kontaktuar përfaqësuesit e aktores për koment, por ende nuk ka marrë një përgjigje.

Debati vjen në një periudhë të ndjeshme ndërkombëtare, ku lufta në Gaza ka shkaktuar dhjetëra mijëra viktima dhe ka rritur tensionet politike e diplomatike në mbarë botën./CNN