Moikom Zeqo, ndër zërat më të fuqishëm të kulturës shqiptare

6 vjet më parë, më 15 qershor të vitit 2020, u nda nga jeta poeti, studiuesi, arkeologu, Moikom Zeqo.

Ai lindi më 3 qershor 1949 në qytetin e Durrësit, por origjina e familjes ishte nga Libohova.

Në vitin 1967 nisi studimet në Fakultetin Histori-Filologji dhe u diplomua në Universitetin e Tiranës në vitin 1971 në degën gjuhë-letërsi. Në vitet 1971-1974 punoi si gazetar dhe redaktor letrar në gazetën “Drita”, ndërsa më 1974-1976 si mësues në Rrogozhinë. Nga viti 1979 deri më 1987 ishte punonjës shkencor pranë Muzeut Arkeologjik të Durrësit, ndërsa më 1987-1990 specialist në sektorin e artit antik në Akademinë e Shkencave në Tiranë.

Nga 31 janar deri më 10 maj 1991 u emërua kryetar i Komitetit të Kulturës dhe po atë vit mori portofolin e ministrit të Kulturës, Rinisë dhe Sporteve. Në vitet 1991 dhe 1992 u zgjodh deputet i PS-së, duke shërbyer deri në vitin 1996. Nga 1997 deri më 2005 drejtoi Muzeun Historik Kombëtar. Moikom Zeqo mban Urdhrin e Lartë “Mjeshtër i Madh” dhe është autor i 62 librave në prozë dhe poezi, studime arkeologjike e historike, si dhe i një numri skenarësh për filma kinematografikë e televizivë me karakter arkeologjik dhe kulturor.

Krijimet e Moikom Zeqos janë përkthyer në gjuhët anglisht, frëngjisht, greqisht, italisht, serbokroatisht, bullgarisht, rumanisht, polonisht, danisht, esperanto dhe gjermanisht. Në pjesën më të madhe të veprës së tij ai ndërthurte kulturën e lashtë me modernizmin, duke e bërë krijimtarinë një urë mes traditës dhe vizionit bashkëkohor.

Është gjithashtu autor i tre ekspozitave vetjake në pikturë.