Zjarret pyjore detyrojnë evakuimin e mijëra vizitorëve në Minesota

Mijëra vizitorëve iu kërkua të evakuonin një zonë të largët të egërsisë në shtetin amerikan të Minesotës, e cila mund të arrihet vetëm me varkë, ndërsa zjarret pyjore po përhapin sasi të mëdha tymi të rrezikshëm në rajon, shkruan AP.

Më shumë se 100 zjarre pyjore janë aktive në Kanada, ku një ekuipazh treni në veri të provincës së Ontarios filmoi momentin kur u gjend i rrethuar nga flakët, përpara se të evakuohej në mënyrë të sigurt.

Erërat po e transportojnë tymin drejt juglindjes. Paralajmërimet për cilësi të pashëndetshme të ajrit të mërkurën shtriheshin nga Minesota, përmes Torontos, deri në Nju Jork.

Gjithashtu priteshin temperatura jashtëzakonisht të larta për këtë periudhë të verës.

“Këshilla më e mirë është të qëndroni brenda për të shmangur si tymin, ashtu edhe vapën,” tha Tyler Hasenstein, meteorolog në Shërbimin Kombëtar të Motit në Chanhassen, Minesota.

Rojet pyjore përpiqen të evakuojnë mijëra kampistë nga zona e izoluar e Minesotës.

Në verilindje të largët të Minesotës, rojet pyjore po përpiqeshin të njoftonin vizitorët se zona e mbrojtur Boundary Waters Canoe Area Wilderness u mbyll të martën, pasi rreth 17 zjarre të shkaktuara nga rrufetë më shumë se një javë më parë po përhapeshin në këtë territor të gjerë natyror, i cili është i arritshëm kryesisht vetëm me kanoe.