SHBA ndalon financimin e programeve për HIV-in në Afrikën e Jugut

Qeveria amerikane ka njoftuar se do të ndërpresë financimin e programeve në Afrikën e Jugut, që synojnë luftimin e përhapjes së HIV/AIDS, raportoi BBC.

Në vend jetojnë mbi 8 milionë persona me HIV, shifra më e lartë në botë.

Deri tani, SHBA-ja ka kontribuar rreth 400 milionë dollarë në vit, përmes programit “Pepfar”, duke mbuluar rreth një të pestën e shpenzimeve totale për këto programe.

Departamenti Amerikan i Shtetit (DASH) e lidhi vendimin me “mungesën e progresit” të Afrikës së Jugut, në kërkesat e administratës dhe nevojën për “vetëmjaftueshmëri”, duke argumentuar se vendi ka kapacitet ekonomik, për të financuar vetë sistemin e tij shëndetësor.

Nga ana tjetër, Pretoria zyrtare (kryeqyteti administrativ i Afrikës së Jugut), nuk ishte njoftuar paraprakisht dhe thekson se programet jetike të trajtimit me antiretroviralë financohen kryesisht nga shteti.

Qeveria ka hedhur poshtë gjithashtu akuzat e mëparshme të Uashingtonit, për diskriminim racial dhe pretendimet për “persekutim të afrikanerëve”.

Vendimi vjen në një moment tensionesh të rritura mes dy vendeve, të ndikuara nga mosmarrëveshje politike dhe diplomatike.