Holanda niset favorite ndaj Suedisë, por nordikët premtojnë betejë deri në fund

Vëmendja e grupit F në Botërorin 2026 është përqendruar te përballja mes Holandës dhe Suedisë, që luhet sonte në orën 19:00 në Hjuston. Të dyja skuadrat synojnë një rezultat pozitiv, por ndeshja ka peshë të veçantë për “tulipanët”, të cilët vijnë pas barazimit 2-2 ndaj Japonisë në takimin hapës.

Holanda konsiderohet favorite falë cilësisë më të lartë në organikë dhe eksperiencës në arenën ndërkombëtare, megjithatë suedezët kanë treguar se janë në formë të shkëlqyer. Fitorja e thellë 5-1 ndaj Tunizisë në ndeshjen e parë ka rritur besimin në kampin nordik, që do të kërkojë të shfrytëzojë çdo hapësirë për të surprizuar kundërshtarin.

Edhe renditja e FIFA-s flet në favor të holandezëve, të cilët pozicionohen në vendin e tetë, ndërsa Suedia në vendin e 38-të. Megjithatë, diferencat në letër shpesh humbasin vlerë në ndeshje të këtij niveli.

Trajneri Ronald Koeman vijon të ketë shqetësime me formacionin. Timber mungon për shkak dëmtimi, ndërsa aktivizimi i De Jong mbetet në dyshim deri në momentet e fundit. Në krahun tjetër, Suedia zbret në fushë me grupin e plotë dhe pa probleme të rëndësishme.

Ndërkohë, ndeshja tjetër e grupit F mes Tunizisë dhe Japonisë do të zhvillohet në orët e para të mëngjesit, duke kompletuar raundin e dytë të këtij grupi mjaft të ekuilibruar.