SHBA-IRAN RINISIN BISEDIMET/ Negociatat zhvillohen në Zvicër me ndërmjetësimin e Pakistanit

Delegacionet e Shteteve të Bashkuara dhe Iranit pritet të zhvillojnë një raund të ri bisedimesh në Zvicër për programin bërthamor dhe zbatimin e marrëveshjes së armëpushimit. Takimi zhvillohet mes tensioneve të reja në Liban dhe deklaratave të Iranit për mbylljen e Ngushticës së Hormuzit.

Shtetet e Bashkuara dhe Irani pritet të rinisin bisedimet e drejtpërdrejta në Zvicër, në një përpjekje për të konsoliduar marrëveshjen e arritur së fundmi për përfundimin e luftës dhe uljen e tensioneve në rajon. Takimi zhvillohet në një moment delikat, pasi Irani ka njoftuar sërish mbylljen e Ngushticës së Hormuzit, duke akuzuar Izraelin për shkelje të armëpushimit përmes sulmeve në Libanin jugor.

Megjithatë, ushtria amerikane ka deklaruar se trafiku detar në ngushticë vijon normalisht. Komanda Qendrore e SHBA-së bëri të ditur se gjatë së shtunës 55 anije tregtare kaluan përmes korridorit strategjik, duke transportuar më shumë se 17 milionë fuçi naftë drejt tregjeve ndërkombëtare.

Në Zvicër kanë mbërritur zëvendëspresidenti amerikan JD Vance dhe një delegacion i lartë iranian i kryesuar nga ministri i Jashtëm Abbas Araghchi dhe kryetari i Parlamentit Mohammad Bagher Ghalibaf. Në bisedime do të marrin pjesë edhe kryeministri i Pakistanit Shehbaz Sharif dhe kreu i ushtrisë pakistaneze, Asim Munir, ndërsa Islamabadi vazhdon të luajë rolin e ndërmjetësit mes palëve.

JD Vance deklaroi se synimi i takimit është avancimi i negociatave për programin bërthamor iranian dhe ruajtja e armëpushimit në Liban. Nga ana tjetër, Teherani kërkon që Shtetet e Bashkuara dhe aleatët e tyre të zbatojnë detyrimet e marra në marrëveshjen paraprake të nënshkruar më herët gjatë javës.

Situata në Liban mbetet e tensionuar. Ministria e Shëndetësisë e Libanit raportoi se të paktën 47 persona u vranë nga sulmet ajrore izraelite të së shtunës, ndërsa ushtria izraelite deklaroi se kishte goditur 80 objektiva të lidhura me Hezbollahun dhe kishte eliminuar dhjetëra luftëtarë të grupit.