SHBA-Iran përplasen në Gjirin Persik/ Çmimi i naftës rritet mbi 4% dhe afrohet me 80 dollarët për fuçi

Çmimet e naftës kanë shënuar një rritje të fortë në tregjet ndërkombëtare, ndërsa përshkallëzimi i tensioneve ushtarake mes Shteteve të Bashkuara dhe Iranit ka rritur shqetësimet për sigurinë e furnizimeve përmes Ngushticës së Hormuzit.

Nafta Brent u rrit me 3.10 dollarë për fuçi, ose 4.08%, duke arritur në 79.11 dollarë për fuçi. Ndërsa nafta amerikane West Texas Intermediate (WTI) u rrit me 2.95 dollarë, ose 4.11%, duke shkuar në 74.36 dollarë për fuçi.

Rritja e çmimeve erdhi pas një vale të re sulmesh mes SHBA-së dhe Iranit. Forcat amerikane raportuan goditjen e disa objektivave në Iran, ndërsa Garda Revolucionare iraniane njoftoi sulme ndaj bazave amerikane në Kuvajt dhe Bahrein.

Në qendër të shqetësimeve është Ngushtica e Hormuzit, një nga korridoret më të rëndësishme të transportit të naftës në botë. Para nisjes së konfliktit, rreth 20% e tregtisë globale të naftës dhe gazit natyror të lëngshëm kalonte përmes kësaj rruge detare.

Sipas të dhënave të kompanisë Kpler, vetëm gjashtë anije kaluan nëpër Ngushticën e Hormuzit gjatë së dielës, numri më i ulët i regjistruar në pesë javët e fundit, duke reflektuar pasigurinë e krijuar nga situata e sigurisë.

Pavarësisht deklaratave se rruga detare mbetet e hapur për trafikun tregtar, njoftimet kontradiktore nga Uashingtoni dhe Teherani kanë shtuar pasigurinë për vazhdimin normal të transportit energjetik.

Agjencia Ndërkombëtare e Energjisë raportoi se furnizimi global me naftë u rrit gjatë muajit qershor pas marrëveshjes së përkohshme mes SHBA-së dhe Iranit, por mbetet ende nën nivelet e mëparshme.

Analistët vlerësojnë se tregjet po ndjekin me kujdes zhvillimet e reja, ndërsa një përshkallëzim i mëtejshëm i konfliktit mund të sjellë rritje të tjera të çmimeve dhe presion mbi furnizimet globale me energji.