Kaos në Gjirin e San Franciskos/ Fundoset varka gjatë një ceremonie përkujtimore

Një person ka humbur jetën dhe tre të tjerë rezultojnë të zhdukur pasi një varkë me ponton u përmbys rreth 600 jardë larg Ishullit Alcatraz në Gjirin e San Franciskos.

Sipas Departamentit të Zjarrfikësve të San Franciskos, alarmi u dha rreth orës 15:37 me orën lokale. Ekipet e shpëtimit gjetën një burrë në ujë në gjendje kritike dhe nisën menjëherë reanimimin, por ai u shpall i vdekur pasi u transportua në breg.

Në bord ndodheshin 20 persona, kryesisht anëtarë të së njëjtës familje, të cilët po merrnin pjesë në një ceremoni përkujtimore. Tre persona të tjerë u plagosën dhe u dërguan në spital, ku ndodhen në gjendje të qëndrueshme, ndërsa 13 pasagjerët e mbetur arritën të shpëtojnë pa lëndime.

Autoritetet amerikane kanë nisur një operacion të gjerë kërkim-shpëtimi, ku janë angazhuar Departamenti i Zjarrfikësve të San Franciskos dhe Roja Bregdetare e SHBA-së për gjetjen e tre personave të zhdukur.

Fillimisht u raportua se varka ishte përfshirë nga flakët, por hetimet paraprake dhe dëshmitë e personave në vendngjarje tregojnë se nuk kishte zjarr. Sipas tyre, deti i trazuar bëri që anija të mbushej me ujë dhe më pas të përmbysej.

Punonjësi i bregut Justin Marceline, i cili ndihmoi në shpëtimin e pasagjerëve së bashku me një peshkatar vendas, e përshkroi situatën si "kaos të plotë", duke thënë se shumë prej të mbijetuarve ishin të rraskapitur ose në panik kur u nxorën nga uji.