Goditjet sizmologjike 'shembin' Venezuelën, deri tani mbi 920 viktima. Ja PAMJET se si tërmetet shkatërruese shndërruan gjithçka

Dy tërmete të fuqishme që goditën Venezuelën të mërkurën kanë shkaktuar një bilanc të rëndë me mbi 920 të vdekur dhe rreth 3,360 të plagosur. Autoritetet vijojnë kërkimet për persona të zhdukur, ndërsa ekipet e shpëtimit punojnë nën rrënoja në kushte të vështira.

Zona më e goditur është La Guaira, në veri të Karakasit, ku janë shembur dhjetëra ndërtesa, përfshirë spitale, qendra tregtare dhe objekte të tjera publike.

Edhe aeroporti kryesor Simón Bolívar dhe portet e rëndësishme të vendit janë prekur nga dëmet.

Sipas autoriteteve, dhjetëra persona janë nxjerrë të gjallë nga rrënojat, ndërsa rreth 172 të tjerë mendohet se janë ende të bllokuar. Në zonë janë regjistruar edhe më shumë se 200 lëkundje pasuese, duke e vështirësuar punën e ekipeve të emergjencës.

Tërmeti i dytë, me magnitudë 7.5, është ndër më të fuqishmit që ka goditur vendin në dekada.

Sistemi shëndetësor po përballet me mungesa të mëdha furnizimesh dhe ilaçesh, ndërsa spitalet e mbetura funksionale janë të mbingarkuara. Mjekët po trajtojnë të plagosurit në qendra të improvizuara pranë zonave të goditura.

Banorët e prekur vazhdojnë të presin lajme për familjarët e tyre. Në disa raste, kërkimet po kryhen mes rrënojave me pajisje minimale, për shkak të dëmtimit të infrastrukturës dhe ndërprerjes së komunikimeve.

Ndihma ndërkombëtare ka nisur të mbërrijë në vend, me ekipe shpëtimi nga disa shtete dhe me mbështetje logjistike e financiare për përballimin e pasojave të katastrofës.