Teknika e thjeshtë e lyerjes që ndryshon plotësisht pamjen e një muri

Rinovimi i një hapësire nuk kërkon gjithmonë shpenzime të mëdha apo punime të gjata. Një teknikë e thjeshtë e lyerjes së mureve mund të ndryshojë ndjeshëm pamjen e një dhome vetëm me dy nuanca boje dhe një furçë të zakonshme.

Teknika, e njohur në dizajnin e interierit si “strié”, krijon një efekt teksture në mur që ngjan me pëlhurë të endur. Për realizimin e saj përdoren dy ngjyra të afërta dhe një furçë me fije të forta, e cila mund të jetë edhe një furçë e zakonshme muri.

Fillimisht muri lyhet me ngjyrën bazë dhe lihet të thahet plotësisht.

Më pas aplikohet shtresa e dytë me nuancë pak më të errët, duke e tërhequr furçën me lëvizje vertikale dhe horizontale.

Kryqëzimi i këtyre lëvizjeve krijon një strukturë të imët që i jep murit thellësi dhe pamje më dekorative.

Efekti bëhet më i dukshëm nën dritë natyrale ose ndriçim të butë artificial, ku relievi i krijuar nga furça merr më shumë formë.

Kombinimet e ngjyrave luajnë rol të rëndësishëm në rezultatin përfundimtar.

Tonet e hapura si e bardha dhe gri krijojnë një stil minimalist, ndërsa ngjyrat natyrale si bezha apo jeshilja ulliri japin ndjesi ngrohtësie. Për një pamje më luksoze përdoren nuanca me shkëlqim perlë ose metalik.

Kjo teknikë përdoret si një mënyrë e thjeshtë për të ndryshuar atmosferën e një dhome pa ndërhyrje të mëdha në hapësirë.