Goditje ndaj flotës ruse/ Sulmet me dronë bllokojnë Detin Azov, Moska përballet me krizë në korridorin strategjik

Transporti detar në Detin Azov është pezulluar nga Rusia pas një serie sulmesh me dronë ukrainas, ku sipas raportimeve janë goditur rreth 90 anije brenda më pak se një jave. Ngjarja ka rritur shqetësimet për sigurinë e një prej korridoreve më të rëndësishme detare për ekonominë dhe furnizimet ruse.

Sipas forcave ukrainase të dronëve, gjatë natës janë goditur 10 anije cisterna dhe katër tragete, ndërsa sulmet kanë prekur edhe një rafineri të madhe nafte në qytetin Syzran.

Po ashtu, janë raportuar goditje ndaj disa nënstacioneve të energjisë elektrike në Krimenë e pushtuar.

Shefi i forcave të dronëve të Ukrainës, Robert Brovdi, bëri të ditur se operacionet kishin prekur edhe të ashtuquajturën “flotë në hije” të Rusisë, e cila përdoret për transportin e produkteve energjetike nën sanksione ndërkombëtare.

Sipas tij, presioni ndaj këtyre mjeteve detare ka kufizuar lëvizjen përmes Ngushticës së Kerçit, korridorit që lidh Detin Azov me Detin e Zi.

Deti Azov ka një rëndësi të veçantë për Rusinë, pasi shërben si rrugë transporti për naftën, drithërat, çelikun dhe produkte të tjera drejt tregjeve ndërkombëtare. Përveç rolit ekonomik, zona ka edhe rëndësi strategjike për operacionet ushtarake të Moskës në rajon.

Autoritetet ruse nuk kanë dhënë ende një bilanc zyrtar për dëmet e shkaktuara nga sulmet, ndërsa situata në Detin Azov vijon të monitorohet për shkak të rrezikut të përshkallëzimit të mëtejshëm.