Gjermania sheh dritë për paqe / Wadephul: Bisedimet Rusi-Ukrainë mund të nisin këtë verë

Ministri i Jashtëm gjerman, Johann Wadephul, ka shprehur optimizëm se gjatë muajve të verës mund të hapet një dritare për nisjen e negociatave që synojnë t’i japin fund luftës në Ukrainë.

Në një intervistë për transmetuesit RTL dhe NTV, Wadephul vlerësoi se situata në front nuk po favorizon qartësisht asnjërën palë, ndërsa luftimet kanë hyrë në një fazë stagnimi.

“Mendoj se tani ekziston një shans për të filluar bisedimet këtë verë”, deklaroi ai, duke lënë të kuptohet se kushtet për dialog mund të jenë më të favorshme se më parë.

Kryediplomati gjerman theksoi se mungesa e përparimeve vendimtare në fushën e betejës mund të nxisë palët të shqyrtojnë më seriozisht rrugën diplomatike për zgjidhjen e konfliktit.

Duke iu referuar presidentit rus Vladimir Putin, Wadephul u shpreh se lideri rus mund të jetë në një moment kur po e konsideron seriozisht mundësinë e negociatave.

Deklarata e ministrit gjerman vjen në një kohë kur përpjekjet ndërkombëtare për arritjen e një armëpushimi dhe nisjen e bisedimeve të paqes vazhdojnë të jenë në qendër të vëmendjes diplomatike globale.