Demokratja e njohur: Kamala Harrisi dëmtoi shanset për një presidente femër

Një nga figurat kryesore progresive në Dhomën e Përfaqësuesve tha se humbja e ish-zëvendëspresidentes Kamala Harris në zgjedhjet e 2024-ës i ka kthyer prapa përpjekjet për të zgjedhur një grua presidente.

Por, sipas përfaqësueses Pramila Jayapal (D-WA), kjo nuk lidhej vetëm me dështimin e Harrisit, por edhe me trajtimin që ajo mori si një grua me prindër me prejardhje afro-amerikane dhe aziatike.

"Mospërfillja që shumë njerëz i treguan asaj si një grua me ngjyrë, si një amerikane me origjinë nga Azia e Jugut, ishte diçka që unë e ndiej çdo ditë," tha Jayapal, e lindur në Indi.

Gjatë një konference në Universitetin e Harvardit, një student e pyeti: “A e dëmtoi Kamala dhe humbja e saj kauzën e zgjedhjes së një gruaje presidente?”

Ish-kryetarja e komitetit progresiv në Dhomën e Përfaqësuesve u përgjigj: “Po, sepse ka shumë gra që e panë atë dhe u ndjenë të zemëruara për atë që ajo duhej të përballonte dhe, në një farëmënyre, për atë që ne duhet të përballojmë.

Për gratë me ngjyrë, kjo ishte shumë e dhimbshme, sepse ky vend është shpëtuar shumë herë nga gratë me ngjyrë.

Ndonëse Harrisi u përgëzua në shumë raste për arritjet e saj si grua dhe si pjesëtare e një pakice, Jayapal sugjeroi, pa dhënë shembuj konkretë, se ajo u diskriminua gjatë fushatës.

Ajo gjithashtu kritikoi vendin për mosmbështetjen e një kandidateje me ngjyrë, pavarësisht se SHBA kishte zgjedhur më parë një president me ngjyrë, Barack Obamën, për dy mandate.

"Si mund të jemi ende në një vend ku një grua e kualifikuar, për më tepër një grua e kualifikuar me ngjyrë, nuk mund të fitojë?" tha Jayapal gjatë seancës së organizuar nga Instituti për Politikë i Harvardit.

Harris ishte kandidatja e dytë femër e Partisë Demokratike, pas Hillary Clinton-it në 2016-ën. Të dyja u mundën nga Donald Trump.

Jayapal tha se edhe ajo ka përjetuar të njëjtën lloj kritike si Harrisi gjatë fushatës së saj, e cila përfundoi me Trump-in duke siguruar një mandat të dytë, ndryshe nga shumica e parashikimeve mediatike.

“Si një grua me ngjyrë, si e para grua amerikane me origjinë nga Azia e Jugut në Kongres, si një nga vetëm dy duzina qytetarësh të natyralizuar që shërbejnë në Kongres, e di sa e tmerrshme është ajo që duhet të përballojmë.

Është e neveritshme, e rëndë dhe të lodh emocionalisht,” tha Jayapal, një ligjvënëse me katër mandate.

Ajo shtoi se presioni për t’u dukur “patriot” si një minoritare liberale për të fituar vota mund të jetë i vështirë.

"Ka një tendencë për të kompensuar duke shkuar në një drejtim tjetër, për të provuar që je patriot, që nuk je një radikale e majtë, që nuk je ekstremiste. Dhe kjo është thjesht një barrë e vështirë për t'u mbajtur," përfundoi ajo.

"Je në një pozitë ku, dhe e kam parë këtë edhe me Barack Obamën, ke mbi vete presione shtesë si një grua me ngjyrë, si një burrë me ngjyrë, veçanërisht si një burrë apo grua me ngjyrë.

Dhe mendoj se prirja është të përpiqesh ta kompensosh këtë duke shkuar në një drejtim tjetër, apo jo?

Duhet të provosh se je patriot. Duhet të provosh se nuk je një radikale e majtë. Duhet të provosh të gjitha këto gjëra. Dhe është thjesht diçka shumë e vështirë," tha ajo.