Brukseli jep sinjale të forta për Shqipërinë/ Von der Leyen vlerëson progresin në negociatat e BE-së

Shqipëria ka marrë sinjale pozitive nga Bashkimi Evropian për ecurinë në procesin e anëtarësimit, gjatë deklarimeve të bëra nga presidentja e Komisionit Evropian, Ursula Von der Leyen, në një vizitë në Irlandë.

Ajo vlerësoi progresin e Shqipërisë dhe Malit të Zi në rrugën e zgjerimit, duke e lidhur procesin me parimin e meritës dhe angazhimit në reforma.

Sipas saj, vendet kandidate po ecin përpara në negociata dhe mbështetja për zgjerimin mbetet e fortë, me synimin që disa prej proceseve të përmbyllen brenda afateve të përcaktuara.

Në fjalën e saj, ajo iu referua edhe zgjerimit historik të BE-së në vitin 2004, duke e cilësuar si një shembull të suksesit të procesit të integrimit dhe ndikimit të tij në zhvillimin ekonomik të vendeve anëtare.

Mbështetje për procesin e zgjerimit shprehu edhe kryeministri i Irlandës, i cili përsëriti angazhimin e vendit të tij në mbështetje të vendeve kandidate drejt Bashkimit Evropian.

Shqipëria ndodhet aktualisht në fazën përmbyllëse të negociatave të anëtarësimit, pas përmbushjes së kritereve të ndërmjetme në grupkapitullin “Themeloret”.

Vendi ka aplikuar për anëtarësim në BE në vitin 2009, ka marrë statusin e vendit kandidat në vitin 2014 dhe ka hapur negociatat në vitin 2022.

Deri tani janë hapur të gjashtë grupkapitujt e negociatave, ndërsa në fund të vitit 2025 janë hapur edhe kapitujt e fundit që lidhen me bujqësinë, burimet dhe kohezionin.

Në Konferencën e tetë të Anëtarësimit në Bruksel, BE ka konfirmuar se Shqipëria ka përmbushur kriteret e ndërmjetme në fushën e shtetit të së drejtës, duke e çuar vendin në fazën e fundit të procesit negociues.

Qeveria shqiptare synon anëtarësimin në Bashkimin Evropian deri në vitin 2030.