Angli-Argjentinë, rikthehet historia e “Dorës së Zotit”? Fanella blu ringjall besimin e Argjentinës para gjysmëfinales

Gjysmëfinalja e Kupës së Botës mes Anglisë dhe Argjentinës nuk është vetëm një duel për një vend në finale, por edhe një përballje që sjell në kujtesë një nga ndeshjet më ikonike në historinë e futbollit. Katër dekada pas sfidës së famshme të vitit 1986, Argjentina rikthehet përballë Anglisë me një detaj që ka ngjallur shumë diskutime.

Harry Kane dhe Lionel Messi do të udhëheqin skuadrat e tyre në sfidën që do të zhvillohet të mërkurën në Atlanta, ndërsa vëmendja mbetet edhe te fanella që do të veshin kampionët në fuqi.

Sipas konfirmimit të FIFA-s, Argjentina do të zbresë në fushë me fanellën blu të transfertës, e njëjta ngjyrë që veshi në çerekfinalen historike të Botërorit 1986 në stadiumin "Azteca", kur Diego Armando Maradona realizoi golat e famshëm të njohur si "Dora e Zotit" dhe "Goli i Shekullit".

Zgjedhja e fanellës vjen për shkak të rregullores, pasi Anglia është përcaktuar si skuadra pritëse dhe do të luajë me fanellën tradicionale të bardhë. Megjithatë, për shumë tifozë argjentinas, fanella blu konsiderohet një ogur i mirë.

Një tjetër precedent që ushqen këtë besim është përballja e Botërorit 1998, kur Argjentina eliminoi Anglinë pas penalltive në fazën e 1/8-ave, ndërsa edhe në atë sfidë mbante veshur fanellën blu.

Tani mbetet për t'u parë nëse historia dhe bestytnitë do të kenë sërish ndikim, apo nëse Anglia do të arrijë të shkruajë një kapitull të ri në rivalitetin e saj me Argjentinën.