A*MËPUSHIM I BRISHTË IZRAEL-HEZBOLLAH/ V*ktima në jug të Libanit nga s*lmet pak orë pas lajmërimit të paktit

Sulmet izraelite në jug të Libanit kanë shkaktuar viktima të reja vetëm pak orë pas shpalljes së armëpushimit me Hezbollahun, duke vënë në pikëpyetje qëndrueshmërinë e marrëveshjes. SHBA shpreh shqetësim për përshkallëzimin e konfliktit, ndërsa Izraeli dhe Hezbollahu paralajmërojnë vijimin e veprimeve ushtarake nëse kërcënimet vazhdojnë.

Sulmet ajrore izraelite në jug të Libanit kanë shkaktuar viktima të reja, më pak se 24 orë pas njoftimit të një armëpushimi mes Izraelit dhe Hezbollahut, duke ngritur pikëpyetje mbi qëndrueshmërinë e paqes.

Sipas agjencisë shtetërore libaneze të lajmeve, avionët luftarakë, dronët dhe artileria izraelite goditën më shumë se një duzinë zonash, kryesisht rreth qytetit të Nabatiehut.

Ushtria izraelite deklaroi se kishte në shënjestër objektiva të Hezbollahut, pasi grupi kishte lëshuar mbi 50 raketa dhe predha ndaj forcave izraelite në jug të Libanit.

Përshkallëzimi i fundit ka ngjallur shqetësim në Shtetet e Bashkuara, të cilat druajnë se tensionet e vazhdueshme mund të rrezikojnë marrëveshjen e paqes me Iranin.

Sipas Uashingtonit, kjo marrëveshje përfshin angazhimin për t’i dhënë fund luftimeve në të gjitha frontet rajonale, përfshirë edhe Libanin.

Izraeli ka bërë të qartë se do të vazhdojë goditjet ndaj kërcënimeve që i konsideron të menjëhershme, ndërsa Hezbollahu ka paralajmëruar se do të vijojë sulmet nëse forcat izraelite mbeten në jug të Libanit.

Konflikti ka shkaktuar pasoja të rënda humanitare. Rreth një milion persona mbeten të zhvendosur, ndërsa dhjetëra komunitete në jug të Libanit janë shkatërruar pothuajse plotësisht.