7 ZGJEDHJE NË 3 VJET/ Bullgaria voton më 27 tetor. Partitë politike pa dakordësi për koalicion

Presidenti bullgar Rumen Radev ka bërë me dije se vendi do të shkojë në zgjedhje të parakohshme parlamentare më 27 tetor. Këto do të shënojnë raundin e 7 të zgjedhjeve në 3 vjet të cilat përkojnë edhe me një mos dakordësi të palëvë politike për një koalicion qeverisës.

Bullgaria do të mbajë zgjedhjet e parakohshme parlamentare, të shtatat në vetëm tre vjet, më 27 tetor. Lajmin e bëri të ditur Presidenti Rumen Radev, pas dështimit të partive të saj politike për të rënë dakord për një koalicion qeverisës.

Radev tha se një qeveri e përkohshme e udhëhequr nga Dimitar Glavçev do të betohet në parlamentin e Bullgarisë të martën për të drejtuar vendin deri në zgjedhje.

Bullgaria, një anëtare e Bashkimit Evropian dhe NATO-s, ka pësuar kaos politik që kur protestat kundër korrupsionit në vitin 2020 rrëzuan një koalicion të udhëhequr nga partia e qendrës së djathtë GERB.

GERB, aktualisht partia më e madhe në parlament, reformatorja Ne Vazhdojmë Ndryshimin (PP) dhe grupi i vogël parlamentar i ITN-së, secili dështoi të ndërtonte një koalicion të qëndrueshëm pas zgjedhjeve jopërfundimtare të 8 qershorit.

Votimi i qershorit u shkaktua nga kolapsi në mars i një koalicioni që përfshin GERB dhe partinë PP. Të dyja partitë janë gjerësisht pro BE-së dhe pro-tregut, por janë ndjekur nga grindjet e vazhdueshme dhe rivalitetet personale.

Bullgaria ka shumë nevojë për një periudhë qeverisjeje të qëndrueshme për të përmirësuar rrjedhën e fondeve të BE-së në infrastrukturën e saj.

Ngërçi politik po pengon gjithashtu planet e saj për t'u bashkuar me euron dhe për të marrë pjesë plotësisht në zonën Shengen.