Kaos te Uruguai para sfidës me Spanjën, përplasje mes Bielsës 3 futbollistëve

Atmosfera në kampin e Uruguait duket larg qetësisë vetëm pak orë përpara përballjes së rëndësishme me Spanjën në Botërorin 2026, e programuar të zhvillohet gjatë natës së ardhshme sipas orës italiane.

Sipas raportimeve të medias uruguaiane El Espectador, në orët e fundit janë regjistruar disa përplasje mes trajnerit Marcelo Bielsa dhe disa prej futbollistëve më me peshë të skuadrës.

Raporti pretendon se portieri Sergio Rochet, mesfushorët Manuel Ugarte, Rodrigo Bentancur dhe kapiteni Federico Valverde i kanë shprehur privatisht pakënaqësitë e tyre teknikut 70-vjeçar.

Objekti kryesor i debatit ka qenë qasja taktike që Bielsa dëshiron të përdorë ndaj Spanjës. Sipas burimeve, një pjesë e lojtarëve preferojnë një strategji më të kujdesshme, me mbrojtje të ulët dhe kundërsulme të shpejta, ndërsa trajneri vazhdon të mbështesë stilin e tij tradicional agresiv dhe me presion të lartë.

Përveç çështjeve taktike, në qendër të diskutimeve kanë qenë edhe metodat e stërvitjes. Disa futbollistë mendohet se kanë shprehur shqetësim për intensitetin e lartë të seancave stërvitore, të cilat sipas tyre po ndikojnë në freskinë fizike të ekipit në një moment vendimtar të turneut.

Deri tani nuk ka pasur reagime zyrtare nga federata uruguaiane apo nga vetë Bielsa lidhur me këto raportime.