Samsung prezanton ekranin e ri OLED për laptopë/ Arrin shkëlqim rekord deri në 1,600 nitë

Samsung ka prezantuar gjeneratën e re të ekraneve tandem OLED për laptopë, një teknologji që premton shkëlqim rekord, jetëgjatësi më të madhe dhe cilësi më të lartë të imazhit.

Paneli i ri ka fituar certifikimin VESA DisplayHDR True Black 1400, ndërsa në kulmin e performancës mund të arrijë deri në 1,600 nitë shkëlqim. Teknologjia tandem OLED përdor dy shtresa OLED të vendosura mbi njëra-tjetrën, duke ofruar jo vetëm ndriçim më të lartë, por edhe konsum më të ulët dhe jetëgjatësi më të madhe të panelit.

Sipas Samsung, dizajni i ri u lejon dy shtresave të ndajnë ngarkesën e punës, çka redukton stresin mbi materialet organike dhe e bën ekranin të zgjasë më shumë se dy herë krahasuar me panelet tradicionale OLED.

Ekrani debuton në Lenovo Yoga Pro 9i Aura Edition, i cili vjen me një panel 16 inç, rezolucion 3.2K, frekuencë rifreskimi 120Hz dhe mbulim të plotë të gamës së ngjyrave sRGB dhe DCI-P3, si dhe 99% të AdobeRGB.

Laptopi mund të pajiset me procesorë Intel Core Ultra 7 ose Ultra 9, grafikë Nvidia GeForce RTX 5050 ose RTX 5060, 32 GB RAM LPDDR5X dhe SSD deri në 1 TB.

Samsung ka bërë të ditur se ekrani i ri tandem OLED do të përdoret edhe nga prodhues të tjerë si Asus, Dell dhe MSI, me modelet e para që pritet të dalin në treg gjatë gjysmës së dytë të këtij viti.

Teknologjia do të prezantohet zyrtarisht edhe në panairin K-Display 2026, i cili mbahet në Seul nga 22 deri më 24 korrik.