Google kërkon leje për lëshimin e 32 milionë mushkonjave të sterilizuara në SHBA!

Google ka kërkuar leje nga qeveria amerikane për të lëshuar deri në 32 milionë mushkonja meshkuj të sterilizuara në Kaliforni dhe Florida, me qëllim reduktimin e përhapjes së sëmundjeve si dengue, Zika dhe ethet e verdha. Këto mushkonja nuk janë të zakonshme: ato janë meshkuj dhe janë trajtuar me një bakter natyral të quajtur Wolbachia, i cili bën që kur ato çiftëzohen me femrat e egra, vezët të mos zhvillohen dhe të mos lindin pasardhës.

Programi quhet “Debug” dhe është pjesë e një iniciative të Google (përmes kompanisë së saj shkencore Verily) që përdor teknologji, inteligjencë artificiale dhe biologji për të ulur popullatën e mushkonjave që përhapin sëmundje. Qëllimi është që, duke liruar këto “mushkonja të mira”, të ulet gradualisht numri i mushkonjave të rrezikshme pa përdorur pesticide kimike.

Kur flitet për kafshët më vdekjeprurëse në botë, shumica mendojnë për luanët, gjarpërinjtë apo merimangat. Por në realitet, kërcënimi më i madh për njerëzimin vjen nga një krijesë shumë më e vogël: mushkonjat. Sipas të dhënave të publikuara nga platforma kërkimore “Our World in Data”, mushkonjat shkaktojnë rreth 760 mijë vdekje çdo vit, duke u renditur si kafshët më vdekjeprurëse në planet. Vetë njerëzit vijnë shumë më pas në këtë listë. Arsyeja kryesore është se mushkonjat përhapin rreth 17% të të gjitha sëmundjeve infektive në botë, përfshirë malarien, dengën, ethet e verdha, chikungunya dhe virusin Zika.

Ndërkaq, një studim i ri sugjeron se mushkonjat, një nga insektet më të vjetra në Tokë, mund të ndihmojnë shkencëtarët të kuptojnë më mirë se kur dhe ku u përhapën njerëzit e hershëm në botë. Mushkonjat ekzistojnë shumë më gjatë se njerëzit dhe fillimisht nuk ushqeheshin me gjakun e tyre. Por sipas një analize të re gjenetike, disa specie mushkonjash në Azinë Juglindore mund të kenë evoluar për të preferuar gjakun e njeriut si rezultat i pranisë së paraardhësve të hershëm njerëzorë në këtë rajon.