Duplantis mposhtet pas gati tre vitesh , nuk kalon 6.05 m në Diamond League!

Ylli i kërcimit me shkop, Armand “Mondo” Duplantis, ka pësuar një humbje të papritur në garën e Diamond League në Stokholm, duke u mposhtur për herë të parë pas gati tre vitesh dominimi në disiplinë.

Në një ditë me atmosferë të veçantë sportive në kryeqytetin suedez, 14.000 spektatorë panë një rezultat surprizë, teksa australiani Kurtis Marschall arriti të triumfojë, duke përfituar nga një paraqitje e pazakontë e kampionit olimpik dhe botëror.

Duplantis nuk arriti të kalojë lartësinë 6.05 metra, duke mos arritur standardet e tij të zakonshme dhe duke i hapur rrugë një fitoreje historike për Marschall, e para e tij në Diamond League.

Pavarësisht rezultatit, ngjarja nuk shihet si alarmuese për atletin suedez, i cili ndodhet vetëm pak ditë larg dasmës së tij, një faktor që mund të ketë ndikuar në përgatitjen dhe fokusin e tij.

Nga ana tjetër, Marschall e cilësoi fitoren si një moment të veçantë në karrierë, duke pranuar se kishte menduar se nuk do ta thyente kurrë dominimin e Duplantis në garat elitare.

Ky rezultat i jep një kthesë të papritur sezonit të kërcimit me shkop në arenën ndërkombëtare, por pa zbehur statusin e Duplantis si një nga figurat më dominuese të sportit modern.