Studim: Ja si shqisat ndikojnë në mënyrën si hamë dhe blejmë ushqim pa e kuptuar

Një analizë e publikuar nga BBC tregon se zgjedhjet tona ushqimore ndikohen fuqishëm nga shqisat, shpesh pa vetëdije, duke bërë që të hamë më shumë dhe të zgjedhim ushqime më pak të shëndetshme.

Sipas studiuesve, shikimi, dëgjimi, nuhatja dhe prekja luajnë rol të rëndësishëm në mënyrën si perceptojmë ushqimin, edhe para se ta provojmë atë. Ekspertët theksojnë se truri krijon pritshmëri bazuar në pamjen, tingullin dhe aromën e ushqimit, duke ndikuar drejtpërdrejt në oreks dhe sasinë e konsumuar

Ndikimi në supermarket dhe blerjet impulsive
Ngjyrat e ndezura të paketimit dhe vendosja e produkteve në nivelin e syve në raft ndikojnë ndjeshëm në zgjedhjet e konsumatorëve. Po ashtu, produktet pranë arkës shpesh çojnë në blerje të paplanifikuara.

 Muzika dhe ambienti ndryshojnë mënyrën e të ngrënit

Studiuesit theksojnë se muzika në sfond mund të ndikojë në ritmin e të ngrënit dhe perceptimin e shijes. Muzika e ngadaltë mund të çojë në konsum më të ulët ushqimi, ndërsa mungesa e shpërqendrimeve si telefoni apo televizori ndihmon në kontroll më të mirë të ushqimit.

Forma e ushqimit dhe enët ndikojnë në ngopje
Edhe mënyra e servirjes ka ndikim në perceptim. Pjatat e dizajnuara mirë, apo enët më të rënda, mund t’i bëjnë njerëzit të ndihen më të ngopur, edhe kur sasia e ushqimit mbetet e njëjtë.

Këshilla për ushqim më të shëndetshëm
Ekspertët sugjerojnë disa strategji për të reduktuar ndikimin e këtyre faktorëve, si mbajtja e ushqimeve të ëmbla larg syrit, përdorimi i enëve jo transparente dhe rritja e volumit të ushqimit me perime pa shtuar kalori.

 “Efekti i ëmbëlsirës”
Edhe kur njeriu është i ngopur, pamja e ëmbëlsirave mund të aktivizojë dëshirën për t’i konsumuar, duke treguar se uria nuk është gjithmonë faktori kryesor në vendimet ushqimore.

Ekspertët përfundojnë se ushqimi është një përvojë komplekse shqisore dhe kuptimi i këtyre mekanizmave mund të ndihmojë në zgjedhje më të shëndetshme në përditshmëri./BBC