Zvicra reagon pas kritikave / Manzambi dhe Xhaka udhëheqin fitoren 4–1 ndaj Bosnje-Hercegovinës në Botërorin 2026

Zvicra ka reaguar në mënyrën më të mirë të mundshme pas paraqitjes së dobët në ndeshjen e parë të Grupit B në Botërorin 2026, duke mposhtur 4–1 Bosnje-Hercegovinën dhe duke u afruar me kualifikimin në fazën tjetër të turneut.

Ekipi i Granit Xhakës e nisi ndeshjen me kontroll të topit, por pa arritur të krijojë shumë raste në pjesën e parë, e cila u mbyll 0–0, ndërsa edhe boshnjakët nuk arritën të rrezikonin seriozisht portën kundërshtare.

Ritmi i sfidës ndryshoi në pjesën e dytë, ku në minutën e 75-të, Manzambi zhbllokoi rezultatin në prekjen e parë pas aktivizimit si zëvendësues, duke i dhënë avantazhin Zvicrës.

Situata u komplikua për Bosnje-Hercegovinën pas kartonit të kuq të Muharemović në minutën e 80-të, çka i hapi rrugën helvetëve për të thelluar rezultatin. Vargas dyfishoi shifrat në minutën e 84-t, ndërsa Manzambi realizoi edhe golin e dytë personal në fund të kohës së rregullt.

Megjithëse Bosnja ngushtoi përkohësisht diferencën me golin e Mahmić në shtesë, Zvicra vulosi fitoren në fund, kur Granit Xhaka shënoi nga pika e penalltisë, duke regjistruar golin e tij të tretë në katër Botërorë të luajtur.

Me këtë sukses, Zvicra ngjitet në kuotën e katër pikëve dhe forcon pozitat për kualifikim në raundin tjetër, duke u rikthyer te pritshmëritë e para turneut si një nga ekipet pretendente në Grupin B.