Rajs vazhdon ndeshjet pavarësisht dëmtimit/ Tuhel: Kishte dhimbje të forta në fund të takimit

Mesfushori i Anglisë, Declan Rice, po përballet me shqetësime në pjesën e pasme të kofshës që nga periudha e Krishtlindjeve, duke luajtur me dhimbje gjatë turneut aktual.

Ai mungoi në ndeshjen e fundit të fazës së grupeve kundër Panamasë për shkak të problemeve fizike, ndërsa para përballjes me Kongon u shpreh se gjendja e tij ishte nën kontroll dhe se vazhdonte të stërvitej normalisht.

Rajs ka treguar se ka pasur një dëmtim të lehtë në kofshë, si dhe një goditje në pulpë gjatë ndeshjes ndaj Ganës, që i shkaktoi enjtje për disa ditë. Megjithatë, ai ka vijuar aktivizimin, duke u shprehur se ndihet në formë për të luajtur.

Në ndeshjen e luajtur në Atlanta, ai u aktivizua si titullar, por u zëvendësua në minutat e fundit nga Stons. Pas takimit është bërë e ditur se mesfushori ka përjetuar dhimbje të forta në fund të lojës.

Trajneri Tomas Tuhel ka konfirmuar se lojtari ka luajtur me shqetësime, duke theksuar se pavarësisht dhimbjes, ai ka tentuar të ndihmojë ekipin deri në fund.

Sipas raportimeve, Tuhel është shprehur se Rajs i ka bërë të ditur se mund të vazhdonte ndeshjen për ekipin, por dhimbja ka qenë e fortë, duke bërë që të mos mund ta përballonte më ritmin e lojës.