Peticion kundër Argjentinës bëhet viral pas Botërorit/ Organizatorët pretendojnë mbi 23 milionë nënshkrime

Një peticion online që kërkonte përjashtimin e Argjentinës nga Kupat e Botës ka shkaktuar reagime të shumta gjatë Botërorit 2026, pasi organizatorët pretenduan se është mbështetur nga më shumë se 23 milionë persona në mbarë botën.

Fushata me emrin “Kick Argentina Out” u krijua nga tifozë të pakënaqur me disa vendime të gjykimit në ndeshjet e Argjentinës dhe me pretendimet se FIFA favorizonte skuadrën e Lionel Messit.

Sipas organizatorëve, peticioni ka marrë 23,316,108 nënshkrime nga rreth 170 vende, megjithatë kjo shifër nuk është verifikuar në mënyrë të pavarur. Nuk është publikuar lista e nënshkruesve dhe nuk dihet mënyra e kontrollit të identitetit të tyre.

Peticioni nuk kishte asnjë lidhje zyrtare me FIFA-n dhe nuk mund të ndikonte në pjesëmarrjen e Argjentinës në turne, duke pasur vetëm karakter simbolik.

Pakënaqësitë ndaj kampionëve të botës u shtuan pas disa episodeve të diskutueshme gjatë turneut, përfshirë ankesat e kundërshtarëve për vendime të VAR-it dhe kritikat ndaj sjelljes së disa lojtarëve argjentinas.

Pas finales së humbur 1-0 ndaj Spanjës, ku pati edhe përplasje mes futbollistëve dhe stafit të të dyja skuadrave, FIFA nisi procedura disiplinore ndaj disa lojtarëve dhe zyrtarëve argjentinas.

Ndërkohë, ndihmëstrajneri Roberto Ayala ka kërkuar falje për përplasjen me Dani Olmon, duke pranuar se emocionet ndikuan në reagimin e tij.