Mirupafshim!... Man.United hap derën dhe konfirmon largimin e Eriksen dhe Lindelöf

Lojtari danez Christian Eriksen dhe lojtari suedez Victor Lindelöf nuk janë më lojtarë të Manchester United, konfirmoi sot klubi i trajnuar nga portugezi Ruben Amorim, pasi kishte vendosur të 'lironte' 10 futbollistë.

Eriksen largohet nga klubi në moshën 33-vjeçare, pas tre sezonesh me “Djajtë e Kuq”, të cilëve iu bashkua si transferim i lirë në vitin 2022 nga Brentford, dhe me të cilët fitoi një Kupë të Ligës Angleze dhe një Kupë FA.

Lojtari ndërkombëtar danez u rikthye në Angli për sezonin 2021/22 pasi pësoi një atak kardiak gjatë Euro 2020. Mesfushori përfundoi kontratën e tij me Interin pasi ka një defibrilator në gjoks, një gjendje që e pengon atë të luajë në Ligën Italiane.

Mbrojtësi qendror suedez, Victor Lindelöf, është i lirë pas tetë sezonesh te Manchester United, i cili e nënshkroi atë nga Benfica në vitin 2017 për 35 milionë euro.

Lojtarët u kishin thënë lamtumirë tifozëve që më 25 maj, në Old Trafford, ashtu si edhe Jonny Evans, i cili, në moshën 37 vjeç, përfundon periudhën e tij të dytë në klub, por sot ata panë Manchester United të bënte zyrtar largimin e tij.

Lista e lojtarëve të “liruar” nga skuadra e Ruben Amorim përfshin edhe të rinjtë Hubert Graczyk, Jack Kingdon, Sam Murray, Tom Myles, James Nolan dhe Tom Wooster.

Tom Heaton është përfshirë gjithashtu në këtë listë, por ‘Djajtë e Kuq’ sqarojnë, në deklaratë, se janë në negociata me portierin për një kontratë të re për sezonin 2025/26.

Manchester United e përfundoi sezonin 2024/25 në vendin e 15-të në Premier League, duke humbur gjithashtu finalen e Europa League ndaj Tottenham (1-0).