Hansi Flick rikthen ritin e veçantë të Barcelonës pas fitores në fushën e Betisit

Barcelona mori një fitore të rëndësishme në transfertë ndaj Real Betisit dhe, menjëherë pas përfundimit të sfidës, trajneri Hansi Flick riktheu një prej riteve të tij të veçanta: inkurajimin personal të çdo lojtari në fushë.

‘Diario Sport’ raporton se ky gjest ka qenë i zakonshëm sezonin e kaluar, por këtë sezon Flick e ka praktikuar rrallë.

Këtë herë, pas paraqitjes mbresëlënëse në Sevilje, ai shkoi te secili futbollist për t’ua shprehur mirënjohjen dhe mbështetjen.

Flick u pa duke përqafuar Jules Kounde-në, Frenkie De Jong-un dhe talentin e jashtëzakonshëm të ekipit, Lamine Yamal-in. Veprimi i tij u prit me shumë pozitivitet, duke reflektuar atmosferën e mirë brenda skuadrës.

Edhe pse lojtarët hynë të lodhur në ndeshje, Barcelona arriti të gjente forcën për të reaguar.

Katalanasit pësuan gol të parët, por më pas u shndërruan në një makineri të pandalshme, duke marrë një avantazh 5-1 dhe duke mbyllur takimin me rezultatin 5-3.

Nën drejtimin e Hansi Flick, Barcelona po tregon se di të marrë rezultate edhe në ndeshje të vështira dhe të lodhshme, duke ndërtuar karakter dhe stabilitet.

Rituali i rikthyer i trajnerit është një sinjal i qartë se uniteti dhe motivimi mbeten thelbësore për projektin e tij në ‘Camp Nou’.