Dinamo City përmbysje spektakolare në Kazakistan, shkon në raundin e dytë të Conference League! Reagon dhe Duka

Dinamo City ka shkruar një nga faqet më të bukura të historisë së saj në arenën evropiane, duke siguruar kualifikimin për në raundin e dytë të UEFA Conference League 2026/27. Skuadra kryeqytetase triumfoi me rezultatin 4-1 ndaj Astanas në “Astana Arena”, duke përmbysur humbjen 1-0 të ndeshjes së parë dhe duke kaluar më tej me rezultatin e përgjithshëm 4-2.

Takimi nisi në mënyrën më të vështirë për Dinamon, pasi vendasit kaluan në avantazh në minutën e 23-të. Kažukolovas u tregua i saktë nga pika e bardhë e penalltisë, duke i dhënë epërsinë Astanas dhe duke e bërë edhe më të vështirë misionin e skuadrës shqiptare.

Megjithatë, gjithçka ndryshoi në pjesën e dytë. Në minutën e 49-të, Kažukolovas u ndëshkua me kartonin e dytë të verdhë, duke lënë Astanan me 10 futbollistë. Vetëm një minutë më pas, Dinamo përfitoi nga epërsia numerike dhe Bruno Dita barazoi rezultatin nga pika e penalltisë.

Skuadra e drejtuar nga trajneri i saj vijoi presionin dhe në minutën e 62-të Hekuran Berisha, pas një asisti të Manellarit, realizoi golin e dytë, duke përmbysur rezultatin e ndeshjes dhe duke barazuar shifrat në totalin e dy takimeve.

Me rezultatin 2-1 në fund të 90 minutave, sfida shkoi në kohën shtesë. Aty Dinamo City tregoi karakter, duke gjetur golin vendimtar në minutën e 93-të, kur Lorenco Vila, pas asistit të Ismailit, dërgoi topin në rrjetë për 3-1, rezultat që i siguronte kualifikimin.

Në sekondat e fundit të shtesës, në minutën e 124-t, Dinamo vulosi një mbrëmje të paharrueshme. Skuadra tiranase realizoi edhe golin e katërt, duke mbyllur sfidën me rezultatin 4-1 dhe duke festuar një kualifikim të madh në transfertën kazake.

Në raundin e dytë kualifikues të UEFA Conference League, Dinamo City do të përballet me fituesin e çiftit Sheriff Tiraspol-NK Aluminij, i cili do të përcaktohet pas ndeshjes së kthimit.

REAGIMI I KREUT TE FSHF

Lidhur me kete kualifik ka reaguar edhe presidenti i Federates Shqiptare te Futbollit, Armand Duka.

"Urime KF Dinamo City për kualifikimin në raundin e dytë të UEFA Conference League. Një paraqitje e denjë dhe një rezultat që i jep edhe më shumë vlerë futbollit shqiptar në arenën ndërkombëtare. Suksese në vazhdim!", shprehet Duka.