Barcelona i vendos afat Atletico Madridit për Julian Alvarez/ Pritet vendimi përfundimtar

Barcelona ka hyrë në fazën vendimtare të përpjekjeve për transferimin e sulmuesit të Atletico Madridit, Julian Alvarez, ndërsa klubi katalunas pritet të marrë një vendim përfundimtar brenda ditëve të ardhshme.

Sipas “AS”, presidenti i Barcelonës, Joan Laporta, ka bërë të ditur se oferta e klubit nuk do të mbetet e hapur pafundësisht. Fundi i korrikut dhe fillimi i gushtit janë përcaktuar si periudha kyçe për të vendosur nëse negociatat do të vazhdojnë apo nëse klubi do të kërkojë një alternativë tjetër.

Pengesë kryesore për Barcelonën mbetet qëndrimi i Atletico Madridit, i cili ka insistuar se Alvarez nuk është në shitje. Klubi madrilen ka deklaruar se nuk do të ndryshonte qëndrim as për oferta shumë të larta, përfshirë shifra prej 100, 150 apo 200 milionë euro.

Barcelona e sheh sulmuesin argjentinas si përforcimin ideal për repartin ofensiv, për shkak të aftësisë së tij për presing, fleksibilitetit taktik dhe intensitetit në lojë.

Trajneri Hansi Flick kërkon qartësi për formacionin sulmues para nisjes së sezonit të ri dhe dëshiron që skuadra të ketë një plan të përcaktuar para mbylljes së afatit kalimtar.

Nëse negociatat për Alvarez dështojnë, Barcelona ka tashmë një alternativë të listuar për përforcimin e sulmit.

Ditët në vijim pritet të vendosin nëse katalunasit do të vazhdojnë insistimin për yllin argjentinas apo do të ndryshojnë strategji në merkato.