Studiuesit zbulojnë trajtim premtues për sëmundjen e Peyronie!

Një studim i ri shkencor ka ngritur shpresa për trajtim më efektiv të sëmundjes së Peyronie, një gjendje që prek miliona meshkuj në mbarë botën dhe mund të shkaktojë lakim të penisit, dhimbje gjatë ereksionit dhe probleme serioze në jetën seksuale.

Studiues nga Anglia Ruskin University kanë zbuluar se sildenafili, përbërësi aktiv i njohur nga Viagra, mund të luajë një rol të rëndësishëm në ngadalësimin ose ndalimin e përparimit të kësaj sëmundjeje kur përdoret në fazat e hershme.

Sëmundja e Peyronie zhvillohet si pasojë e formimit të indit fibroz brenda penisit, duke shkaktuar deformim, dhimbje dhe ndikim të madh psikologjik te pacientët. Vlerësohet se prek rreth 10 për qind të meshkujve gjatë jetës.

Sipas studimit të publikuar në “The Journal of Sexual Medicine”, kombinimi i barnave të grupit PDE5, si sildenafili (Viagra) dhe tadalafili (Cialis), me tamoxifen, mund të japë rezultate të rëndësishme në fazën akute të sëmundjes.

Në kërkim morën pjesë 133 meshkuj me Peyronie në fazë të hershme, të cilët u trajtuan për tre muaj me terapi të kombinuar dhe u krahasuan me një grup që mori trajtim standard.

Rezultatet treguan se 43% e pacientëve që morën terapinë e kombinuar patën përmirësim të lakimit, krahasuar me 15% në grupin e kontrollit. Po ashtu, dhimbja gjatë ereksionit ra ndjeshëm, nga 65% në vetëm 1.5% pas tre muajsh trajtim.

Ekspertët thonë se këto rezultate mund të ndryshojnë mënyrën e trajtimit të sëmundjes në të ardhmen, pasi aktualisht nuk ekziston një terapi orale e miratuar që ndalon përparimin e saj në fazat e hershme.

Megjithatë, mjekët theksojnë se barnat si Viagra, Cialis apo tamoxifeni duhet të përdoren vetëm nën mbikëqyrje mjekësore, veçanërisht te pacientët me probleme kardiake ose tension të gjakut.