Zgjedhja e presidentit në Kosovë/ Bilalli: Afati po mbaron, kompromisi mbetet i paqartë

Republika e Kosovës gjendet përballë një situate kritike politike, teksa afati kushtetues për zgjedhjen e presidentit të ri po afron me shpejtësi.

Me 4 marsin si datën e fundit, partitë politike janë në një garë kundër kohës për të gjetur një konsensus që do të shmangte zgjedhjet e parakohshme, një skenar që do të përbënte një ngarkesë të madhe për vendin.

Sipas analistit politik Lutfi Bilalli, situata është delikate dhe kërkon një marrëveshje politike mes pozitës dhe opozitës. Për zgjedhjen e presidentit nevojitet prania e të paktën 80 deputetëve në sallën e Kuvendit, një numër që Lëvizja Vetëvendosje nuk mund ta arrijë pa mbështetjen e të paktën një prej partive opozitare.

Në qendër të diskutimeve mbetet figura e Vjosa Osmanit. Edhe pse kryeministri Albin Kurti nuk e ka shprehur hapur mbështetjen për të dhe ka bërë thirrje për një kandidat konsensual, analisti Bilalli beson se në fund, Kurti do të propozojë sërish Osmanin.

Kjo shihet si një lëvizje taktike për të siguruar mbështetjen e nevojshme nga PDK ose LDK, duke e bërë më të lehtë kandidimin e saj.

Megjithatë, ky plan përballet me rezistencën e fortë të opozitës. Partitë opozitare kanë deklaruar se nuk do të votojnë për Osmanin, duke e cilësuar atë si një figurë "të njëanshme" gjatë mandatit të saj.

Negociatat intensive po vazhdojnë, ku janë diskutuar edhe emra të tjerë, si propozimi për një kandidat nga familja Jashari, i cili u refuzua.

"Ora po troket dhe afati i fundit është mesnata e së mërkurës. Nëse deri atëherë Kuvendi nuk arrin të zgjedhë presidentin e ri, vendi do të shkojë në mënyrë të pashmangshme drejt zgjedhjeve të reja parlamentare. Orët në vijim janë vendimtare për të ardhmen politike të Kosovës, ndërsa mbetet për t'u parë nëse klasa politike do të arrijë një kompromis apo do ta zhysë vendin në një cikël të ri zgjedhor."

NDIQNI INTERVISTËN E PLOTË: