Të dielën Rrogozhina voton, Meta: Qytetarët t’u qëndrojnë presioneve, të rikonfirmojnë Shkëlqim Hoxhën

Teksa pas dy ditësh do të përsëriten zgjedhjet në Rrogozhinë, pasi rezultati u quajt i pavlefshëm duke u kontestuar votat e burgut, vjen një mesazh nga kreu i Partisë së Lirisë, Ilir Meta.

Meta iu është drejtuar me një thirrje qytetarëve që t’u rezistojnë presioneve dhe intimidimeve dhe të rikonfimojnë kandidatin e koalicionit “BF”, pasi sipas tij më 14 maj Hoxha ishte fitues, por rezultati u përmbys përmes votimit të paligjshëm në burgun e Rrogozhinës.

“Qytetarët e Rrogozhinës e bënë zgjedhjen e tyre dhe e zgjodhën kryetarin e tyre, por në mënyrën më mafioze, më të paligjshme, përmes votimit të paligjshëm në burgun e Rrogozhinës, u përmbys vullneti i qytetarëve të lirë të gjithë Rrogozhinës.

Unë i ftoj dhe i inkurajoj të gjithë qytetarët e Rrogozhinës t’u qëndrojnë presioneve, intimidimeve dhe të rikonfirmojnë me vullnetin e tyre përsëri kandidatin tonë z.Hoxha si kryebashkiak i Rrogozhinës sepse jam i sigurt që do të jetë një menaxher i shkëlqyer i atij komuniteti”, shkruan Meta.

Në 23 korrik qytetarët e Rrogozhinës do t’u drejtohen sërish kutive të votimit për të zgjedhur kryebashkiakun e ri.

Komisioneri Shtetëror i Zgjedhjeve, Ilirjan Celibashi vendosi këtë datë për mbajtjen e zgjedhjeve, pasi Kolegji Zgjedhor pranoi kërkesën e koalicionit “Bashkë Fitojmë”, për ripërseritjen e zgjedhjeve në Rrogozhinë.

Koalicioni “Bashkë fitojmë” kundërshtoi rezultatin e zgjedhjeve të 14 majit, ku u shpall fitues kandidati i Partisë Socialiste, Edison Memolla, me argumentin se kutia e fundit që i dha fitoren atij ishin votat e të burgosurve.

KQZ pranoi kërkesën për rinumërim dhe nga hapja e kutive diferenca e Memollës me kandidatin e koalicionit “Bashkë Fitojmë”, Shkëlqim Hoxha u ngushtua nga 30 në 21 vota.