"Kuvendi ka humbur rolin e kontrollit"/ Bardhi në Parlamentin Europian: Mbrojtja e korrupsionit pengon integrimin

Gazment Bardhi ka ngritur kritika ndaj mënyrës së funksionimit të Kuvendit të Shqipërisë gjatë takimit të përbashkët BE-Shqipëri në Parlamentin Europian, duke thënë se dobësimi i rolit të parlamentit ndikon edhe në procesin e integrimit europian.

Në fjalën e tij, Bardhi u shpreh se Kuvendi ka humbur funksionin e kontrollit dhe mbikëqyrjes ndaj qeverisë dhe, sipas tij, është kthyer në një institucion që miraton vendimet e ekzekutivit.

Ai solli si shembull refuzimin e debatit në Kuvend për Rezolutën e Parlamentit Europian për Shqipërinë, si dhe mungesën e zhvillimit të interpelancave të kërkuara nga opozita me kryeministrin Edi Rama.

Sipas Bardhit, opozita ka kërkuar 11 interpelanca gjatë këtij sesioni parlamentar, por asnjë prej tyre nuk është zhvilluar. Ai u shpreh se mungesa e llogaridhënies parlamentare dobëson shtetin e së drejtës dhe standardet demokratike.

Bardhi kritikoi edhe mënyrën e organizimit të strukturave parlamentare që lidhen me integrimin europian, duke thënë se ndryshimet në komisionet parlamentare kanë kufizuar rolin e opozitës në procesin e negociatave me Bashkimin Europian.

Ai përmendi gjithashtu refuzimin e kërkesave të opozitës për komisione hetimore dhe çështjen e mosheqjes së imunitetit të zëvendëskryeministres Belinda Balluku, e cila është nën hetim nga SPAK.

Sipas Bardhit, mbrojtja politike e zyrtarëve të lartë të përfshirë në procese gjyqësore nuk ndihmon rrugën europiane të Shqipërisë.

Në përfundim të fjalës së tij, Bardhi u shpreh se procesi i integrimit nuk matet vetëm me hapjen e kapitujve negociues, por edhe me mënyrën se si funksionojnë institucionet demokratike.

Ai kërkoi një Parlament që ushtron plotësisht funksionet kushtetuese, kontrollon qeverinë dhe ka rol aktiv në procesin e integrimit europian.