Kume zbulon prapaskenën e PS-së: Ligji për referendumet anashkalon reformën zgjedhore dhe komisionin

Nisma e Partisë Socialiste për të kaluar një ligj të posaçëm për referendumet shihet si një lëvizje që anashkalon dhe minon punën e nisur në Komisionin e Reformës Zgjedhore.

Sipas ish-kryetarit të Komisionit Qendror të Zgjedhjeve, Kristaq Kume mazhoranca po përdor një “shteg” ligjor për të çuar përpara agjendën e saj, duke shmangur diskutimet në tryezën ku palët politike supozohet të arrijnë konsensus për ndryshimet në legjislacionin zgjedhor.

I ftuar në studion e emisionit “Ora e Betit” në “Ora News” të moderuar nga gazetarja Beti Njuma theksoi se argumenti kryesor qëndron te fakti se Kodi Zgjedhor aktual, specifikisht në kapitullin e tij të nëntë, parashikon rregullat për mbajtjen e referendumeve.

Ky kapitull mbetet në fuqi derisa një ligj i ri, i veçantë, të miratohet. Duke përgatitur një draft të tillë, mazhoranca socialiste krijon mundësinë që ai të mos kalojë fare nga Komisioni i Reformës Zgjedhore, por të ndjekë rrugën parlamentare si çdo projektligj tjetër.

Sipas Kumes, ky draftligj, duke qenë se kërkon një shumicë të cilësuar prej 84 votash, do të kalojë përmes komisioneve parlamentare përkatëse, duke e anashkaluar totalisht komisionin e posaçëm të reformës.

Kjo lëvizje interpretohet nga Kume si një veprim që mund të delegjitimojë dhe të minojë të gjithë procesin e reformës zgjedhore, për të cilin palët kanë nisur punën.

Çuditërisht, interesi për një ligj të tillë ka munguar historikisht nga partitë e mëdha. Kërkesa për një legjislacion të dedikuar për referendumet, që rrjedh si detyrim nga vetë Kodi Zgjedhor, ka rënë vazhdimisht në vesh të shurdhër.

Madje, në legjislaturën e kaluar, një draftligj i ngjashëm i depozituar nga partia e drejtuar prej Dashamir Shehit u injorua plotësisht si nga mazhoranca, ashtu edhe nga opozita e atëhershme.

Ky interes i papritur i mazhorancës aktuale ngre dyshime mbi qëllimet e vërteta të nismës. Mbetet e paqartë nëse synimi është të përmirësohet realisht funksionimi i demokracisë së drejtpërdrejtë apo nëse ligji do të përdoret për të arritur objektiva të tjera politike, duke vënë në dyshim cilësinë dhe paanësinë e procesit.

PËR MË SHUMË NDIQNI EMISIONIN E PLOTË “ORA E BETIT”