Me maska dhe të armatosur, RENEA mësyn ambientet e Ora News dhe Rtv Ora
Forca të shumta të policisë, me maska dhe të armatosur mësynë në mesditë në ambientet e televizioneve Ora dhe Ora News.
Në mënyrë të paprecedentë, a thua se po ndërhynin në një skenë ku kishte ndodhur një skemë krimi e dyfishtë.
Prezenca e madhe e policisë ka sjellë habi jo vetëm te stafi, por dhe te të ftuarit.
Presioni i menjëhershëm ndaj të ty televizioneve ka sjellë dhe reagimin e fortë të mediave brenda dhe jashtë vendit.
Ndërkaq në facebook, Andi Bushati, sjell në vëmendje se ky është rasti i dytë i tentativës për mbylljen e televizionin, kjo pas kërkesës së ISHSH për mbyllje për shkak se kishte me shumë se dy të ftuar në emisionet televizive.
Bledian Koka nga ana e tij e konsideron koinçidencë spakiane faktin që kur Ndroqi padit Veliajn për kërcënime SPAK-u hesht, por kur gjyqi merr trajta serioze, paditësi kthehet i paditur.
Ndërsa i padituri fshihet me Covid në rezidencën e tij multimilionëshe në kodra që kërkojnë diell.
Ndërkaq dhe Associated Press sjell në vëmendje që procesi i nisur prej SPAK nis kur presidenti i Yldon Media Group Ylli Ndroqi ka nisur një proces gjyqësor ndaj kryebashkiakut Erion Veliaj.
Por po ashtu dhe politikanë dhe analistë të shumtë kanë reaguar duke e konsideruar një sulm politik, teksa dukshëm me ironi Agim Xhafka shprehet:
"Nga sot në Ora News lajmet do të përgatiten nga Forcat e Ndërhyrjes së Shpejtë, dhe do ti lexojë ministri Lleshaj. Parashikimin e motit do ta japë drejtori i policisë dhe horoskopin forcat RENEA".
Forcat e policisë së bashku me mjetet e tyre policore u tërhoqën nga ambjentet e televizioneve rreth orës 17:30.
Por sigurisht edhe pse nën masa të forta të policisë gazetarët e RTV Ora dhe Ora News do të vazhdojnë të jenë pranë qytetarëve dhe sa më pranë së vërtetës.
Lexoni të gjitha lajmet:Goditje politike ndaj RTV Ora dhe Ora News