Nga pasarelat e botës në stadium/ Kush është Imaan Hammam, supermodelja që po çmend tifozët e Marokut

Botës së futbollit nuk i mungon shkëlqimi, por kombëtarja e Marokut krenohet me një nga mbështetëset më të famshme dhe më tërheqëse në planet. Bëhet fjalë për top-modelen ndërkombëtare Imaan Hammam, e cila përveç suksesit të jashtëzakonshëm në sfilatat e modës, njihet botërisht edhe për pasionin e saj të zjarrtë ndaj "Luanëve të Atlasit".

29-vjeçarja me origjinë të përzier ka pushtuar industrinë e modës duke bashkëpunuar me gjigantë të tillë si Versace, Prada dhe Ralph Lauren, si dhe ka spikatur me stilin e saj unik në shfaqjet prestigjoze të "Victoria’s Secret". E lindur në Amsterdam nga një babi egjiptian dhe nënë marokene, Hammam ka zgjedhur të përqafojë fort rrënjët e saj amtare, duke u kthyer në një nga imazhet më ikonike të tifozerisë marokene në mbarë botën.

Bukuroshja e pasarelave është parë rregullisht në shkallët e stadiumeve duke mbështetur yjet e kombëtares si Achraf Hakimi dhe Noussair Mazraoui. Ajo ishte një prani e palëkundur edhe gjatë rrugëtimit historik të Marokut në Kupën e Botës "Katar 2022, ku ekipi afrikan shkroi historinë duke arritur deri në gjysmëfinale pas eliminimit të Spanjës dhe Portugalisë, përpara se të ndalej nga Franca dhe Kroacia.

Përveç ndeshjeve të Botërorit, Imaan Hammam ka ndjekur nga afër "Luanët" edhe në sfidat e rëndësishme të Kupës së Afrikës, duke ndarë rregullisht momente festive nga stadiumi me miliona ndjekësit e saj në rrjetet sociale. Për të, rrënjët kulturore marokene dhe egjiptiane mbeten shtyllat kryesore që udhëheqin stilin dhe vlerat e saj në jetë.

Sot, si një urë lidhëse perfekte mes luksit të modës dhe emocioneve të futbollit, sytë e të gjithëve janë kthyer nga Botërori 2026, ku supermodelja pritet të jetë sërish në qendër të vëmendjes në mbështetje të kombëtares së saj të zemrës.