Gjykata i jep të drejtë Icardit, rrëzohet kërkesa e Wanda Narës!

Sulmuesi argjentinas Mauro Icardi ka dalë fitues në një vendim të rëndësishëm gjyqësor në Itali, pasi gjykata e Milanos ka rrëzuar kërkesën e ish-bashkëshortes së tij, Wanda Nara, për një pagesë të përkohshme prej 250 mijë eurosh në muaj.

Vendimi është marrë nga gjyqtarja Anna Cattaneo, e cila ka konstatuar se nuk ekzistojnë kushtet për një masë urgjente mbështetjeje financiare në favor të saj.

Sipas arsyetimit të gjykatës, situata ekonomike e Wanda Narës është “shumë e shëndetshme”, duke u vlerësuar se ajo është financiarisht e pavarur dhe e aftë të sigurojë të ardhura në mënyrë të vetëqëndrueshme.

Gjykata theksoi gjithashtu se Nara është në moshë të re, ka kualifikime profesionale dhe mundësi reale për të ndërtuar pasuri pa mbështetje financiare të përkohshme.

Ky vendim pranon argumentet e paraqitura nga avokatët e Icardit, duke bërë që futbollisti të mos ketë detyrim për pagesa mujore ndaj saj deri në përfundimin e procesit gjyqësor.

Çështja mes palëve mbetet ende e hapur dhe pritet që vendimi përfundimtar të merret në muajt në vijim, ndërsa beteja ligjore vazhdon të tërheqë vëmendje të madhe në mediat ndërkombëtare.