FOTO/ Oriola Marashi ngre alarmin për ndotjen e detit: Dola nga uji dhe rrobat e banjës u ...

Oriola Marashi ka ngritur shqetësimin për ndotjen e detit, duke ndarë me ndjekësit një përvojë personale që, sipas saj, ka përjetuar pas një dite në plazh.

Përmes një postimi në InstaStory, modelja publikoi një fotografi ku shfaqen rrobat e saj të banjës me njolla të zeza, për të cilat pretendon se janë shkaktuar nga prania e naftës në ujë.

"Sot dola nga deti dhe rrobat e banjës dolën kështu. Kjo nuk është rërë. Kjo është NAFTË", shkroi Oriola, duke shoqëruar postimin me foton që ilustronte situatën.

Modelja theksoi se ndotja e ujërave përbën një kërcënim serioz jo vetëm për ekosistemin detar, por edhe për shëndetin e pushuesve, duke bërë thirrje që fenomeni të mos kalohet në heshtje.

Në reagimin e saj, Marashi u kërkoi ndjekësve të ndajnë përvojat e tyre nëse janë përballur me situata të ngjashme, si edhe të kërkojnë më shumë përgjegjësi nga institucionet për mbrojtjen e mjedisit.        

"A ju ka ndodhur edhe juve? Është e rëndësishme të flasim dhe të kërkojmë përgjegjësi", përfundoi ajo.

Postimi i modeles ka nxitur reagime në rrjetet sociale, ndërsa shqetësimi për ndotjen e ujërave bregdetare rikthehet në vëmendje në kulmin e sezonit turistik, kur mijëra pushues frekuentojnë plazhet shqiptare.