Anila Bisha padit AKSHI-n për përdorimin e imazhit të saj në asistenten virtuale ‘Diella’

Aktorja Anila Bisha ka depozituar një padi në Gjykatën Administrative kundër Këshillit të Ministrave, Agjencisë Kombëtare të Shoqërisë së Informacionit (AKSHI) dhe kompanisë Apel, lidhur me përdorimin e imazhit të saj në krijimin e asistentes virtuale “Diella”.

Sipas padisë, aktorja pretendon se figura e “Diellës” përfaqëson një avatar të rikrijuar mbi bazën e pamjes së saj fizike, duke cenuar të drejtat e saj mbi përdorimin e imazhit. Për këtë arsye, ajo ka kërkuar vendosjen e një mase sigurimi, me qëllim pezullimin e menjëhershëm të përdorimit të figurës deri në përfundimin e procesit gjyqësor.

Në argumentet e paraqitura në gjykatë, Bisha thekson se marrëveshja kontraktuale që kishte lidhur me kompaninë Aleat ishte e vlefshme deri më 31 dhjetor 2025 dhe parashikonte përdorimin e imazhit të saj vetëm për funksionin e asistentes virtuale në platformën shtetërore e-Albania. Sipas saj, kjo marrëveshje nuk autorizonte përdorimin e figurës për role të tjera publike apo për një personazh të identifikuar si “ministrja Diella”.

Çështja pritet të shqyrtohet nga Gjykata Administrative, e cila do të vendosë fillimisht mbi kërkesën për pezullimin e përdorimit të imazhit. Ndërkohë, rasti ka nxitur diskutime të gjera mbi kufijtë ligjorë të përdorimit të figurës personale, të drejtave të autorit dhe etikës në hapësirën digjitale.

“Ministrja Diella” u prezantua publikisht nga kryeministri Edi Rama gjatë Asamblesë së Partisë Socialiste më 11 shtator, si pjesë e kabinetit të ri qeveritar. Më pas, Rama deklaroi se Diella do të zhvillonte edhe “fëmijët” e saj virtualë, të cilët sipas tij do të zëvendësonin 83 deputetët e Partisë Socialiste.