Shtohen azilkërkuesit në Shqipëri/ INSTAT: Vijnë kryesisht nga Afganistani, Palestina dhe Egjipti

Numri i shtetasve të huaj që kërkojnë azil në Shqipëri ka pësuar një trend të fortë rritës gjatë vitit të fundit.

Sipas të dhënave zyrtare të Instat , gjatë vitit 2025 u regjistruan 144 kërkesa për azil, ose 40 më shumë se në vitin 2024, çka tregon një rritje të fluksit të personave që kërkojnë mbrojtje ndërkombëtare në vendin tonë

Nëse bëjmë një krahasim të shifrave me vitin 2024 rezulton se Shqipëria ka regjistruar nëj rritje të numrit të azilantëve me mbi 38%.

Sipas vendeve të origjinës, pjesa më e madhe e azilkërkuesve janë shtetas të Egjiptit, të cilët përbëjnë 39,6% të totalit. Më pas renditen shtetasit nga Afganistani me 11,8% dhe Palestina me 9,7%, ndërsa pjesa tjetër u përket shtetasve nga vende të tjera.

Aplikimet për azil nuk kanë qenë të shpërndara në mënyrë të njëtrajtshme gjatë vitit. Mbi 63% e kërkesave janë paraqitur vetëm gjatë muajve gusht, shtator dhe tetor, duke e bërë këtë periudhë kulmin e fluksit të azilkërkuesve në Shqipëri.

Ndërkohë përsa i përket marjes së shtetsëisë  ose pasaportës shqiptare nga të huajt rezulton se shumica e personave që fituan shtetësinë shqiptare ishin me origjinë nga Kosova, e cila përbënte mbi  56 % të totalit. Pas saj renditen Turqia me 20 %, ndërsa Maqedonia e Veriut dhe Italia përfaqësojnë secila nga 4,8% të rasteve.

Të dhënat zyrtare  të Instat evidentojnë  se Gjatë vitit 2025 në total fituan shtetësinë  495  nga të cilët 306 e rifituan ndërsa 189 e morën për herë të parë.

Për sa i përket strukturës sipas moshës, grupmosha 30–39 vjeç përbën kategorinë më të madhe si mes atyre që fituan shtetësinë shqiptare.

Rritja e numrit të azilkërkuesve mund të lidhet me ndryshimet në flukset migratore dhe me situatën në vendet e origjinës së tyre. Megjithatë, pavarësisht kësaj rritjeje, numri i kërkesave për azil në Shqipëri mbetet relativisht i ulët në krahasim me shumë vende të tjera evropiane.