Valë zemërimi për Princin Andrew, arratisje me avionin privat të një manjati arab drejt Francës

Andrew Mountbatten-Windsor ka dalë sërish në qendër të vëmendjes pas raportimeve se është larguar në mënyrë të paqartë nga rezidenca e tij në Sandringham për të kaluar një fundjavë në Francë si i ftuar VIP i një miliarderi nga Lindja e Mesme, sipas Daily Mail.

Sipas raportimit, ish-Duka i Jorkut ka qëndruar për disa ditë pranë Saint-Malo, në pronën e një manjati të biznesit të veshjeve sportive dhe mbarështimit të kuajve, Mohammed Baker. Ai dyshohet se ka udhëtuar me avion privat nga Norwich drejt Francës dhe është kthyer pas një qëndrimi tre-ditor në kompleksin e njohur të stallave “MAB Stables”, ku mbahen dhjetëra kuaj race.

Gjatë qëndrimit të tij, Andrew thuhet se ka marrë pjesë në aktivitete të ndryshme, përfshirë kalërim në plazh, bowling në ambiente historike dhe darka të përgatitura nga një shef privat kuzhine. Burime të cituara nga media britanike thonë se vizita ka qenë e organizuar si një pushim privat luksoz.

Raportimet kanë ngritur gjithashtu pikëpyetje për një dëmtim të dukshëm në fytyrën e Andrew, i cili është fotografuar me mavijosje disa ditë pas kthimit në Britani, megjithëse nuk ka konfirmime zyrtare mbi rrethanat e mundshme të ngjarjes.

Sipas dëshmive të banorëve lokalë dhe personave të lidhur me fermën, ish-mbreti britanik ka qenë i shoqëruar gjatë gjithë kohës dhe ka marrë pjesë në aktivitete të përbashkëta me mikpritësin e tij.

Mohammed Baker, një figurë e njohur në industrinë e veshjeve sportive në Lindjen e Mesme dhe Azinë Juglindore, thuhet se ka lidhje të gjera biznesi dhe shoqërore në rajon, përfshirë kontakte me figura të larta shtetërore dhe ekonomike.

Andrew, i cili prej vitesh është tërhequr nga detyrat mbretërore pas skandaleve që e kanë shoqëruar, vazhdon të mbetet një figurë e debatueshme në opinionin publik britanik. Në vitin 2019 ai u tërhoq nga angazhimet zyrtare, ndërsa më vonë humbi edhe disa prej titujve të tij mbretërorë. Raportimi i ri pritet të shtojë më tej presionin dhe interesin mediatik rreth jetës private të tij, në një kohë kur figura e tij mbetet e kontestuar në Britani dhe më gjerë.