Ushtria afgane sulmon Pakistanin në përgjigje ndaj bombardimeve

Ushtria afgane sulmoi sot instalimet ushtarake kufitare në Pakistan, në përgjigje të bombardimeve vdekjeprurëse fundjavën e kaluar.

“Dhjetëra ushtarë pakistanezë u vranë (…). Disa u plagosën gjithashtu dhe të tjerë u morën robër”, tha zëdhënësi i qeverisë talebane, Zabihullah Mujahid.

Ai shtoi se më shumë se 15 posta kufiri pakistaneze ishin eliminuar.

Ky informacion u mohua nga një zëdhënës i kryeministrit pakistanez, Shehbaz Sharif, i cili deklaroi se “asnjë pozicion pakistanez nuk u mor ose u dëmtua”, ndërsa afganët pësuan “humbje të mëdha”.

”Këto ofensiva në shkallë të gjerë u nisën në shenjë hakmarrjeje kundër armikut”, tha Hamdullah Fitrat, zëvendëszëdhënësi i qeverisë afgane.

Një përfaqësues i ushtrisë afgane shpjegoi se trupat e vendosura në provincat lindore të Nangarharit dhe Kunarit kishin kryer “sulme masive kundër posteve pakistaneze”.

Zyra e guvernatorit dhe banorët e provincës Kunar konfirmuan se një operacion ushtarak ishte duke u zhvilluar.

”Afganët hapën zjarr në mënyrë të njëanshme në disa pozicione përgjatë kufirit me provincën Khyber Pakhtunkhwa të Pakistanit”, raportoi Ministria e Informacionit e Pakistanit duke shtuar se Pakistani kishte nisur “një përgjigje të menjëhershme dhe të fuqishme”.