Trump premton mbështetje për Libanin pas takimit me Aoun në Shtëpinë e Bardhë: Do ta ndihmojmë shumë

Presidenti i Shteteve të Bashkuara, Donald Trump, ka premtuar mbështetje të fuqishme për Libanin gjatë takimit me homologun e tij libanez, Joseph Aoun, në Shtëpinë e Bardhë.

Trump deklaroi se SHBA-ja do ta ndihmojë Libanin në përpjekjet për stabilitet dhe rindërtim pas muajsh tensione dhe përplasjesh mes Izraelit dhe Hezbollahut, grupit militant të mbështetur nga Irani.

“Ka qenë një vend i keqtrajtuar dhe ne do ta trajtojmë siç duhet dhe me respektin që meriton. Ne do ta ndihmojmë shumë”, u shpreh Trump, pa dhënë detaje konkrete mbi format e mbështetjes.

Nga ana tjetër, presidenti libanez Joseph Aoun falënderoi kreun amerikan për mbështetjen ndaj Libanit, sovranitetit të tij, institucioneve shtetërore dhe Forcave të Armatosura Libaneze.

Gjatë takimit, Trump u pyet edhe për tërheqjen e plotë të trupave izraelite nga territori libanez, duke deklaruar se Izraeli “është në proces ripozicionimi”, por pa dhënë më shumë hollësi.

Aoun e vlerësoi qasjen e Trump, duke e cilësuar vizionin e tij si një vizion për paqe dhe një trashëgimi të rëndësishme.

SHBA-të kanë kërkuar stabilitet në Liban, ndërsa situata në Lindjen e Mesme mbetet e tensionuar për shkak të përshkallëzimit të konfliktit me Iranin.

Ndërkohë, Libani shpreson që mbështetja amerikane të ndihmojë në forcimin e ushtrisë libaneze dhe në rikthimin e kontrollit shtetëror në zonat jugore të vendit, ku për vite me radhë ka pasur ndikim të madh Hezbollahu.