Tragjedi në Leicester! Humb jetën shqiptari 28-vjeçar, arrestohen dy persona

Një ngjarje e rëndë ka tronditur komunitetin shqiptar në Angli, ku një 28-vjeçar është gjetur i pajetë në rrugët e qytetit të Leicesterit. Viktima është identifikuar si Ervin Lita, i njohur gjithashtu me mbiemrin Axhami.

Trupi i pajetë i të riut është gjetur nga shërbimi i ambulancës në orët e para të mëngjesit të datës 12 korrik. Pavarësisht ndërhyrjes së shpejtë të ekipeve mjekësore, për 28-vjeçarin nuk ka pasur asnjë mundësi shpëtimi.

Sipas BBC, autoritetet policore lokale kanë nisur menjëherë një hetim intensiv për të zbardhur shkaqet dhe rrethanat e kësaj vdekjeje misterioze.

Në kuadër të veprimeve hetimore, policia ka ndaluar dy persona, të moshës 36 dhe 27 vjeç, banues në Leicester, të cilët dyshohen si autorë të përfshirë në këtë ngjarje tragjike. Oficerët kanë krijuar një portal për incidente të mëdha, në të cilin çdo dëshmitar ose kushdo me kamera sigurie ose kamera në makinë mund të ndajë informacion.

Inspektori i Detektivëve Kevin Hames tha se,  “Hetimi ynë mbetet ende në vazhdim. Ne kemi një ekip të përkushtuar që po përparon me një numër hetimesh ndërsa vazhdojmë të përcaktojmë rrethanat e plota të asaj që ka ndodhur. Kjo përfshin analizën e kamerave të sigurisë, ekzaminimin mjeko-ligjor dhe bisedën me dëshmitarët. Vazhdoj t’i kërkoj kujtdo që ka ndonjë informacion, i cili ende nuk ka folur me ne, të na kontaktojë sa më shpejt të jetë e mundur. Nuk është tepër vonë, prandaj flisni me ne”.