Shpërthimi i municioneve të vjetra në Qipro shkakton zjarr masiv/ Ministri urdhëron hetim

Një zjarr i madh ka përfshirë një zonë stërvitjeje ushtarake në Qipro, pasi inxhinierët e Gardës Kombëtare shkatërruan raketa dhe municione të çaktivizuara, duke shkaktuar përhapjen e flakëve në një zonë me bimësi të thatë.

Ministri i Mbrojtjes së Qipros, Vassilis Palmas, ka urdhëruar nisjen e një hetimi për të zbuluar arsyet e shpërthimit të municioneve në kushte ekstreme, me temperatura që arrinin rreth 40 gradë Celsius, pavarësisht se procedura të tilla janë të kufizuara gjatë muajve të verës.

Palmas shprehu “pakënaqësi të thellë” për veprimet e batalionit të inxhinierëve, duke paralajmëruar masa të ashpra nëse konstatohen shkelje të rregullave.

Rreth 100 zjarrfikës, të mbështetur nga tetë avionë, arritën të vënë nën kontroll zjarrin, i cili dogji rreth 120 hektarë bimësi të egër. Për shkak të përhapjes së flakëve u evakuuan përkohësisht dy komunitete pranë zonës, por nuk pati dëme në banesa apo prona.

Hetimi pritet të përcaktojë nëse janë shkelur protokollet për asgjësimin e municioneve. Sipas ministrit Palmas, raporti përfundimtar pritet të përfundojë brenda dy javëve të ardhshme.

Qipro, si shumë vende të Mesdheut Lindor, është përballur vitet e fundit me rritje të rrezikut nga zjarret për shkak të verave të thata dhe temperaturave të larta.