SHBA feston 250-vjetorin e pavarësisë me ceremoni madhështore, fishekzjarrë dhe ndërprerje nga moti ekstrem

Shtetet e Bashkuara të Amerikës kanë shënuar 250-vjetorin e pavarësisë me një seri festimesh të zhvilluara në të gjithë vendin, që përfshinë fishekzjarrë, koncerte, fluturime ajrore ceremoniale dhe aktivitete publike.

Në qendër të festimeve ishte Uashingtoni, ku në “National Mall” u mbajt një nga aktivitetet kryesore kombëtare.

Programi u ndërpre përkohësisht për shkak të një stuhie të fuqishme me rrufe, që detyroi autoritetet të evakuonin zonën për arsye sigurie.

Më pas, aktivitetet rifilluan dhe u mbyllën me një shfaqje të madhe fishekzjarrësh.

Në eventin kryesor mbajti fjalim edhe Donald Trump, i cili u ndal te situata e krijuar nga moti i keq dhe masat e sigurisë të ndërmarra gjatë aktivitetit.

Ai foli gjithashtu për historinë e vendit dhe 250-vjetorin e pavarësisë, duke e lidhur mesazhin e tij me vlera si liria dhe forca kombëtare.

Festimet u zhvilluan në shumë qytete të SHBA-së, përfshirë Nju Jorkun, Los Anxhelesin dhe Filadelfian. Në Filadelfia u organizuan ceremoni historike pranë “Independence Hall”, ku në vitin 1776 u nënshkrua Deklarata e Pavarësisë.

Në kuadër të aktiviteteve u mbajtën edhe ceremoni natyralizimi, ku qindra persona morën shtetësinë amerikane dhe bënë betimin për Kushtetutën e SHBA-së.

Festimet u zhvilluan në kushte të vështira atmosferike. Një valë e fortë të nxehti përfshiu disa shtete, ndërsa stuhi të fuqishme shkaktuan ndërprerje të energjisë dhe anulime të disa eventeve.

Sipas autoriteteve, qindra mijëra familje mbetën përkohësisht pa energji elektrike në disa shtete, ndërsa disa aktivitete u shtynë për arsye sigurie.

Mesazhe për përvjetorin dhanë edhe ish-presidentë amerikanë, të cilët u ndalën te rëndësia e demokracisë, angazhimit qytetar dhe vlerave themelore të shtetit amerikan.

Festimet vijuan gjatë gjithë ditës në formën e koncerteve, paradave dhe aktiviteteve simbolike në mbarë vendin.