“Portat e ferrit do të hapen”/ Trump paralajmëron Iranin pas vr*sjes së dy ushtarëve amerikanë

Tensionet mes Shteteve të Bashkuara dhe Iranit janë përshkallëzuar pas vdekjes së dy ushtarëve amerikanë në Jordani. Presidenti Donald Trump ka urdhëruar Komandën Qendrore të SHBA-së (CENTCOM) të nisë sulme ndaj objektivave iraniane si kundërpërgjigje ndaj sulmit me raketa dhe dron.

Sipas zyrtarëve amerikanë, operacionet ushtarake janë përqendruar kryesisht ndaj infrastrukturës në jug të Iranit, pranë zonës së Ngushticës së Hormuzit. Sulmet kanë vijuar prej disa ditësh, ndërsa situata mbetet e tensionuar në rajon.

Trump ka përdorur një gjuhë të ashpër ndaj Iranit, duke paralajmëruar se përgjigjja amerikane do të jetë e fortë.

Ndërkohë, Departamenti i Shtetit ka lëshuar një paralajmërim sigurie për qytetarët amerikanë në mbarë botën, veçanërisht për ata që ndodhen në Lindjen e Mesme. Autoritetet amerikane kanë kërkuar kujdes të shtuar për shkak të mundësisë së një përshkallëzimi të mëtejshëm.

Sipas njoftimit, objektet diplomatike amerikane dhe interesat e SHBA-së jashtë vendit mund të përballen me kërcënime nga grupe të lidhura me Iranin.

Sulmi në Jordani, që solli vdekjen e dy ushtarëve amerikanë, la gjithashtu një tjetër ushtar të zhdukur në veprim. Katër ushtarë të tjerë u dërguan në spital për trajtim mjekësor dhe më pas u liruan, ndërsa disa të tjerë me plagë të lehta janë rikthyer në detyrë.