Trump paralajmëron Iranin: Nëse konflikti përshkallëzohet, Republika Islamike nuk do të ekzistojë më

Presidenti amerikan Donald Trump paralajmëroi Iranin se mund të përballet me pasoja edhe më të rënda nëse vazhdon përshkallëzimi i konfliktit me Shtetet e Bashkuara.

Në një postim në Truth Social, Trump konfirmoi se avionët amerikanë kanë goditur depo raketash, dronësh dhe sisteme radarësh iranianë, duke argumentuar se sulmet erdhën pas shkeljes së marrëveshjes së armëpushimit.

Ai shkroi se Irani duket se nuk po nxjerr mësime nga zhvillimet e fundit dhe paralajmëroi se, nëse situata përkeqësohet, SHBA mund të vendosë ta përfundojë operacionin me mjete ushtarake. Sipas tij, në një skenar të tillë, Republika Islamike e Iranit "nuk do të ekzistojë më".

Ndërkohë, Komanda Qendrore e SHBA-së bëri të ditur se Marina dhe Forcat Ajrore amerikane goditën 10 objektiva ushtarake brenda dhe pranë Ngushticës së Hormuzit, si kundërpërgjigje ndaj sulmit me dronë iranianë ndaj anijes cisternë "Kiku".

Sulmet iraniane kanë prekur edhe Kuvajtin dhe Bahreinin. Në Kuvajt u vu në shënjestër aeroporti ushtarak Ali Al Salem, ku janë të dislokuara forca amerikane, ndërsa në Bahrein u godit baza detare e Marinës së SHBA-së. Për të dyja sulmet, Irani ka marrë përgjegjësinë.

Në reagimin e fundit, Garda Revolucionare e Iranit paralajmëroi se bazat amerikane në rajonin e Gjirit do të përballen me një situatë shumë të rëndë në ditët në vijim. Sipas saj, çdo veprim i mëtejshëm nga SHBA do të marrë një kundërpërgjigje të ashpër.