Evropa në “furrë”/ Rekorde historike të të nxehtit, temperatura deri në 41°C dhe viktima në disa vende

Evropa po përballet prej disa ditësh me një valë ekstreme të të nxehtit që ka përfshirë pothuajse të gjithë kontinentin, duke sjellë temperatura rekord dhe pasoja të shumta në shëndetësi, transport dhe jetën publike.

Në Gjermani, Belgjikë dhe Holandë janë regjistruar temperatura që kanë thyer rekordet e muajit qershor, ndërsa në qytetin Saarbrücken në Gjermani u shënua një vlerë e përkohshme prej 41.3°C. Në disa zona të tjera të Evropës, temperaturat kanë arritur deri në 40°C, duke prekur miliona qytetarë.

Autoritetet shëndetësore në Francë dhe Spanjë raportojnë rritje të rasteve të lidhura me nxehtësinë dhe viktima të regjistruara që nga fillimi i valës. Në Francë, sistemi shëndetësor është vënë nën presion të shtuar, ndërsa janë anuluar disa evente publike për shkak të rrezikut për qytetarët.

Në Mbretërinë e Bashkuar, Holandë dhe Belgjikë janë regjistruar gjithashtu temperatura shumë të larta, ndërsa në disa zona të Holandës është shpallur alarm i kuq për nxehtësinë ekstreme.

Situata ka ndikuar edhe në transport. Një linjë Eurostar është ndërprerë përkohësisht pranë Brukselit me rreth 400 pasagjerë në bord, ndërsa disa ngjarje masive janë anuluar ose shtyrë në Francë, Gjermani dhe Holandë për shkak të kushteve të rrezikshme.

Në Spanjë, sistemi i monitorimit shëndetësor ka regjistruar qindra vdekje të mundshme të lidhura me temperaturat e larta, ndërsa në disa rajone janë raportuar edhe zjarre pyjore që kanë detyruar mijëra banorë të evakuohen.

Ndikimi i valës së të nxehtit është ndjerë edhe në Zvicër, ku një central bërthamor është detyruar të ndalojë përkohësisht aktivitetin për shkak të temperaturës së lartë të ujit në lumenj, që nuk mund të siguronte më ftohjen e reaktorëve.

Ekspertët ndërkombëtarë paralajmërojnë se Evropa po përjeton një nga valët më të forta të të nxehtit të regjistruara ndonjëherë, e nxitur nga sisteme të qëndrueshme presioni të lartë dhe e përkeqësuar nga ndryshimet klimatike. Sipas shërbimeve klimatike, kontinenti evropian po ngrohet më shpejt se mesatarja globale.

Autoritetet në disa vende u bëjnë thirrje qytetarëve të shmangin ekspozimin në diell gjatë orëve më të nxehta dhe të marrin masa mbrojtëse, ndërsa parashikimet tregojnë se temperaturat e larta mund të vijojnë edhe në ditët në vijim, pavarësisht një lehtësimi të lehtë të motit në disa rajone.