Sulmet me dronë në Detin e Zi / Rusia godet tri anije tregtare të huaja në korridorin ukrainas

Rusia ka sulmuar me dronë tri anije tregtare me flamuj të huaj që po lundronin përgjatë korridorit detar të eksportit të Ukrainës në Detin e Zi. Zëvendëskryeministri ukrainas, Oleksiy Kuleba, njoftoi se sulmet e kryera gjatë natës së të enjtes shkaktuan zjarre në mjete, por ato u shuan me shpejtësi nga ekuipazhet.

Sipas autoriteteve portuale, anijet e goditura mbanin flamujt e Vanuatu-s, Komoreve dhe Panamasë.

Ndër to, marina ukrainase veçoi sulmin ndaj anijes së mallrave “Ant” , në pronësi turke dhe me flamur të Vanuatu-s ,  e cila po udhëtonte e ngarkuar nga rajoni i Odesës drejt Turqisë. Si pasojë e këtij goditjeje, dy anëtarë të ekuipazhit mbetën të plagosur dhe u evakuuan.

Që nga fillimi i pushtimit të Ukrainës, Rusia ka shënjestruar vazhdimisht rrugët detare dhe portet jetike, duke goditur rëndë tregtinë e jashtme dhe ekonominë ukrainase.